YJH hte NARGIS NBUNG LARU

2008 ning May 2 ya shana 10:00 grupyin kaw nna May 3 ya shani 12:30 daram du hkra bung ahpawt wa ai Nargis Nbung Laru Laba a majaw, Myen Mung Hkalup Hpung Ginjaw (MBC) kata kaw shang lawm nga ai Buga Hpung Kahtawng (285), Nta Kun Dinghku (17,559) ni laja lana hten za hkrum nna, Hpung Up Hpung Woi ni yawng (28) asak sum lawm mat, Hkalup Hpung Hpung Masha (10,000) jan si hkrum mat ai hte, yawng (96,762) jan tsinyam duhka hkrum mat nga ai lam chye lu ai. YJH hpung kata hta mung, dum nta hpe hpun daw agrawp kamyet hkrum nna hten za mat ai dum nta ni law law rai nga ai. Dum nta shamat kau ai, hten za mat ai hpung masha ni mung grai law la nga ai.

Shingrai, jamjau yak hkak hkrum nga ai hpung masha ni hpe karum shingtau lu na matu NARGIS NBUNG HPYEN RA AHKYAK KARUM KAHTAU HPUNG hpe May 4, 2008 ya Laban shani hta e hpaw ninghtan let karum kahtau magam bungli ni hpe galaw sa wa ai lam chye lu ai.

Galaw lai wa sai Magam Bungli ni
1. Hpun daw kamyet hkrum ai hpung masha ni a dum nta ni, Hkristan Sasana wang ni hpe jasan jaseng ya lu sai.
2. Lu na, sha na yak hkak mat ai ni hpe dang di lu ai daram karum madi shadaw dat lu sai.
3. Dum nta htenza hkrum mat ai ni hpe Ja Gumhpraw hte madi shadaw ya ai lam, ku galup ya ai lam ni hpe galaw lai wa sai.

May 20 ya shani du hkra YJH kaw na karum ya dat lu sai Jahpan ni
1. Hpun jasan jaseng ya lu sai dum nta/Sasana wang ni: 24
2. Kum, galup, kapa, gram lajang ya dat lu sai dum nta/ Nawku hpung ni: 10
3. Ja Gumhpraw hte madi shadaw ya lu sai hpung masha dum nta ni: 95
4. Laksan Alu Gmhpraw hte karum ya lu sai Hkalup Hpung Ginjaw ni: 4
(Pwo Kayin, Sagaw Kayin, MBCU, Asho Chin)

Hpungtau Bot a Karum Kahtau ai lam
Matut nna mung karum ningtum ai lam hpe YJH Hpungtau Bot kaw na lit la ai hte, Pwo Kayin Hkalup Hpung Ginjaw kata kaw nga nga ai mare kahtawng ni de Na Htu Jak, N-Gu, Jak Sau, Jum, Sut, Hpajawng, Jahtai, hte Alu Ja Gumhpraw ni hte karum shingtau ya lu sai.

YHF Ramma ni a ap nawng dawjau nga ai lam ni
Nargis Nbung Laru Karum Kahtau magam bungli hta myit rawt ap nawng mayu ai YJH Ramma ni, Youth of Holy Force (YHF) ngu ai hpung hpe hpaw ninghtan la let, tinang lu ai atsam ni hte, Nbung Laru byin ai shani kaw na ya dai ni ten du hkra dingyang ap nawng dawjau nga ma ai. Ndai YHF hta shang lawm nga ai YJH Ramma ni yawng (35) rai nga ai. Ayeyarwaddy Thaing, Bogalay, Myapago, Theethant, Htantabin, Asilay, Seinyyathi, Thapyaekone, Kunchyankone, Htawkkyant mare ni de sup hte sup sa du nna, dum nta sum, namdum ni hpe shachyaw ya ai, daw galau nga ai hpun kawa ni hpe ret jasan jaseng ya ai, lu hka htung ni htu ya ai, tsi mawan hte seng ai hpaji jaw ya ai lam, tsi tsi ya ai lam ni, Nawku Jawng, Laika Sharin Jawng ni, Gawknu ni, Sara/ma ni a dum nta ni hpe gram gawgap ya ai, malu masha ni, na htu jak hte jak sau ni, hkai nmai, nai mam nli tum ni, hkau na kaw lang mai ai arung arai ni hte karum shingtau ya ai, hta n-ga, mare masha ni a myit n-gun atsam bai lu la hkra myit sharawt n-gun jaw ya ai lam ni, woi ginsup ai, Chyum Mungga hte mahkawn ni sharin ya ai lam ni hpe galaw nga ma ai. Dai ni du hkra karum ya dat lu sai mare ni (7), nta htinggaw (617) rai nga ai lam chye lu ai.