Yangon Kachin Baptist Church
No. (40/B), Shwe Pyi Aye Street,
Sanchaung T/s, Yangon, Myanmar.
Phone: 01-527732, 502404 ext. 116
Email: JLIB_HTML_CLOAKING

194617

Rev. Ja Naw Jr.

RAWT GA, BAI GAWGAP GA!
(Nehemia 2:17-18)
February 3, 2008

Rev. Ja Naw Jr.

Ga Nhpaw
BC 445, Persi Hkawhkam Artahkere hkaw dung ai (20) ning aten hta, Hkawhkam wa gaw Nehemia hpe shi a masha ni hte rau, karum madi shadaw ai lam ni hte hpawn, Babelon kaw nna, Yerusalem de wa na matu ahkaw ahkang jaw dat sai re. Nehemia gaw Yerusalem mare du jang, galaw ra ai magam bungli ni hpe maram masam nhtawm, Israela masha ni hpe myit sharawt zinlum la nna, Yerusalem mare bunghku hpe woi awn gawgap sai re.

I. Nehemia a myit jasat
i) Yerusalem mare a bunghku ni hte mare chyinghka ni rum agrawp mat nna, hkru hkat wa ai hpe mu yang, Nehemia a myit masin hta myit ru yawn hkyen ai myit hpe ja ja hkam sha sai re. (1:3-4)
ii) Israela masha ni akyu lu la na matu Hkawhkam Artahkere hpang de n hkrit n tsang sit shang wa nna, Yerusalem de wa na lam hpyi shawn nu ai re. (2:1-8)
iii) Yerusalem mare bunghku hpe bai gawgap ai magam amu garai n hpang shi yang, Nehemia gaw shi nan magam bungli kade kaba ai, masha n-gun, arung arai n-gun kade daram jai lang ra na lam hpe azin ayang maram masam yu ai (2:11-16) hpang she, Israela masha ni hpe magam bungli galaw hpang na matu ndau shana myit sharawt sai re. (2:17-18)
iv) Gawgap bungli galaw nga ai aten hta dingbai dingna jaw ai lam ni hpe hkrum ai rai tim, myit ndaw nhten ai sha, bungli galaw ai ni gaw lata maga mi hte amu galaw, lata maga mi gaw ri nhtu lang rai nna bungli hpe nbyin yang byin hkra shakut galaw ma ai re. (4:-6, 16-17).
v) Bungli galaw nga ai aten hta mung masha ni lu na sha na yak wa ai majaw, Nehemia hpe mara shagun ma ai rai tim, shi myit ndaw nhten ai. (5:1-6)
vi) Nehemia gaw Israela masha ni a hten za nga ai arawn alai ni hpe mung shading sharai ya ai re. (5:6-13)
vii) Nehemia gaw shi a matu hpa akyu mung n tam ai sha, Israela masha ni akyu lu la na matu san san sha ap nawng magam gunhpai lai wa sai re. (5:14-19)

II. Dai ni anhte a matu Yerusalem ngu ai gaw gara hpe tsun ai rai kun?
Jinghpaw Wunpawng myu sha langai mi a matu “Yerusalem” kanang rai ta? Tinang a daidaw Buga, tinang a Mungdan rai kun? Shing nrai, kaga shara mi naw rai na kun? Sung sung myit yu ga. “Yerusalem” gaw Israela masha ni a masin salum nga ai shara re. Shanhte a Nawku Htingnu nga ai shara, shanhte a Jiwoi ni a lupding lupra nga ai shara re. Dai ni anhte a masin salum kanang rai ta? Anhte a daidaw buga, anhte a mungdan, anhte a Nawku Htingnu hte anhte a Jiwoi ni a lupding lupra nga nga ai shara kaw rai nga yang gaw, anhte a matu “Yerusalem” gaw dai nan rai sai. Dai hpe myit maju jung nna, gawgap sa wa ra ai bunghku ni hpe atsam dat nna gaw sharawt ra ai re. Lam amyu myu a majaw mungkan shara shagu de nga pra hkawm mat wa ai rai tim, dai hpe galoi mung myit dum shingran nga ra ai. De a matu karum madi shadaw nga ra ai re.

III. Rawt Ga, bai Gawgap ga
A. Rawt Ga
“Rawt ga” ngu ai lachyum gaw, ndum shami yup pyaw yup nga nga ai kaw nna dum hprang wa saga ngu ai re. Tinang a mungdan, tinang a buga hte tinang a myu sha ni hten za mat wa nga ai lam hpe yu nna, dai lam ni a matu myit machyi let, bai gawgap ai amu bungli hpe ta tut galaw sa wa na matu su hprang saga ngu ai lam re. Agung alau amyu myu a hpang de n hkan nang mat wa na matu sadi maja nga ga ngu ai lam rai nga ai.Hkristan asak hkrung lam hte nhtan shai ai hku asak hkrung nga ai lama rai yang, dai kaw nna bai gayin wa saga ngu ai lam re.

B. Bai Gawgap ga
“Bai” ngu ai ga si gaw, mi na nga nga lai wa sai lam, atsam marai, kri hte madang tsang ni de bai du dep wa hkra, ngu ai lachyum rai nga ai. Chyum masa hku tsun ga nga yang, Edin sun kaw nga lai wa sai madang tsang de bai du wa hkra shakut shaja sa wa na matu tsun ai re. Dai ni anhte bai gawgap ra ai lam ni gaw;
i) Jiwoi ni a makam masham hte maren ta tut asak hkrung hkawm sa lu na matu
ii) Jiwoi ni tinang a amyu, htunghking, laili laika hte aga, tinang a daidaw buga hte tinang a mungdan hpe tsaw ra manu shadan ai zawn anhte mung tsaw ra manu shadan lu na matu
iii) Jinghpaw Wunpawng myu sha ni nang shoi nang sha n nga ai sha, galoi mung myit hkrum mang hkrum kahkyin gumdin nga na matu
iv) Tinang a mungdan hte myu sha ni akyu lu la na matu, tinang akyu n tam ai sha ap nawng dawjau mayu ai myit rawng wa na matu
v) Ntsa lam sha Hkristan mying gun nga ai ni n tai ai sha, Hkristan hpung masha langai mi hta nga ra ai myit masa, hkam la ai lam, arawn alai ni hte hpring tsup kri dung ai hpung masha ni byin tai wa na matu.... ndai lam ni rai nga ai.

Ga Hpungdim
Dai ni anhte Jinghpaw Wunpawng myu sha ni ndai madang, ndai tsang hta asak hkrung hkawm sa nga lu ai gaw, moi na Jiwoi ni myit hkrum mang rum let, salu salat hte atsam dat ap nawng dawjau gawgap wa ai majaw sha rai nga ai. Ya dai ni anhte a aprat aten hta, Makam masham lam, Htunghking, Aga, Laika, Kahkyin gumdin lam, Mung masa lam, Hpaga yumga hte galaw lu galaw sha lam, Hpaji hparat lam, Mayaw htinggaw de ai lam, Myit mang yaw shada ai lam hte, Arawn alai akyang lailen ni hte seng nna mye shading ra ai lam ni hpe bai gawgap ra nga ai. Htawm hpang de galu kaba wa na anhte a kashu kasha ni, masha wa a man hte, Karai Kasang a man hta myi man kaji ai masha ni n byin tai na matu, Karai Kasang anhte hpe jaw da ai atsam marai ni hpe jai lang let, “Rawt ga, bai Gawgap sa wa ga” law.