Yangon Kachin Baptist Church
No. (40/B), Shwe Pyi Aye Street,
Sanchaung T/s, Yangon, Myanmar.
Phone: 01-527732, 502404 ext. 116
Email: JLIB_HTML_CLOAKING

196776

Rev. K.D Tu Lum

Tara Rap Ra Yesu Hte Sha
(Justice with Jesus Alone)
53-Lang Na KBC Masat Laban Mungga
March 16, 2008
Rev. K.D Tu Lum


Ga Nhpaw
Mungkan danghta, nga yawng nga pra hpe hpan da ai Karai Kasang gaw tara rap ra ai Madu rai nga ai. Tara rap ra ai lam (Justice) gaw dai ni na anhte a mungkan hta ra ahkyak dik ai lam rai nga ai. Tara rap ra ai lam gaw Karai Kasang a marai nsam (Attribute) langai mi mung rai nga ai.. Tara rap ra ai lam gaw, dinghpring ai lam, tengman ai lam, tara malang ai lam ni rai nga ai (Righteousness, Truth and Justice). Yesu gaw, “lam gaw ngai rai nga nngai, tengman ai hte asak mung ngai rai nga nngai” (Yawhan 5:30) nga tsun da ai majaw, shi gaw tengman ai Madu, tara ai hku jeyang dawdan ai wa rai nga ai.

Tara rap ra ai lam hte seng nna Yesu sharin ya ai lam ni
1. Karai Kasang a mungdan hte dinghpring ai lam hpe shawng tam ra ai lam (Mahte 6:33).
2. Tara rap ra ai lam lu la na matu, matsan mayan ni, bawng dung ai ni, myi kyaw ai ni hte zingri zingrat hkrum ai ni hpe kabu gara shiga hkaw tsun na lam (Luka 4:18-19).
3. N tara ai hku amyat htuk, adip arip re ai lam hpe n ra sharawng ai majaw, Nawku Htingnu hta rai dut sha ai ni hte gumhpraw byan sha ai ni hpe Madu Yesu shaden kau wu ai (Mahte 21:22).

Masha amyu langai hte langai a lapran na tara rap ra lam
(Racial Justice)
Mungkan ntsa e, masha amyu law law nga pra wa ai lam gaw Karai Kasang a yaw shada ai lam rai nga ai. Madu Yesu gaw masha amyu garan ginhka ai lam hte n ju n dawng ai lam hpe n ra sharawng nga ai. Masha amyu baw shagu hpe dai kabu gara shiga hkaw tsun sakse hkam na matu pyi htet da nga ai (Mahte 28:19-20, Marku 16:15). Yesu Hkristu gaw shi nan Yuda amyu rai nga ninglen, Samari num hpe Yaku a hka htung e, asak ntsin jaw ya sai (Yawhan 4:1-30). N bung ai masha amyu shada da n ju n dawng, garan ginhka ai lam gaw Karai Kasang a mungga hte n htan shai nga ai. Shada gasat gala ai lam (War), Mayam yam sha ai lam (Slavery), Sut masa amyat htuk ai lam (Economic Exploitation), Gumchying gumsa myit (Dictatorship), N ju n dawng garan ginhka ai lam (Prejudice and Discrimination) ni hpe shabyin nga ai. N bung ai masha amyu shada da tsaw ra, hkungga, chye na yang she, tara rap ra ai lam lu la na re.

Num hte La lapran na tara rap ra ai lam
(Gender Justice)
Shawng ningpawt kaw na, shinggyim lasha hte numsha yan hpe Karai Kasang a hkrang bung sumla hte hpan da nga ai (N.N 1:27) re majaw, la hte num gaw Karai Kasang a man e manu dan ai lam maren sha rai nga nna shan lahkawng gaw shinggyim ahkaw hakang hpring hpring lu ai yan rai nga ai. (Equal Human Rights and Dignity). Hkristu hta Yuda, Heleni, Mayam Shanglawt, Lasha, Numsha ngu garan ginhka na lam n nga ai (Galati 3:28). Anhte Jinghpaw Wunpawng sha ni hta, htunghking hku nna num ma ni hpe shagrit kau chye ga ai. Ya dai ni KBC hku nna Num ni hpe Sari lu ta mara Hpung Up dang ya ai lam rai n nga shi ai. Dai gaw grai yawn hpa rai nga ai. Num magam gun ni mung Karai Kasang a hkrang bung sumla ni rai nga ai majaw La ni hte maren Hpung Up aya dang la mai nga ai re. MBC, MCC hte mungkan hkristan uhpung uhpawng ni law law hta Num ni hpe Hpung Up aya dang ya nga sai. Madu Yesu gaw num ni, gaidai ni, ma ni hpe manu shadan ai hte makawp maga nga ai. Num hte La lapran hta tara rap ra ai lam nga yang she teng man ai tara rap ra lam nga wa na re.manu shadan ai hte makawp maga nga ai. Num hte La lapran hta tara rap ra ai lam nga yang she teng man ai tara rap ra lam nga wa na re.

Sut masa hte seng ai tara rap ra lam
(Economic Justice)
Dai ni na aten hta, lusu ai ni hte matsan ai ni a lapran grai mala hka mat wa nga ai. Hpa majaw matsan ai law wa a ta? Matsan mayan ni hpe adip arip re ai lam (Oppression of the poor), dinghpring ai lam hpe gumhpraw hte dut sha ai lam (Bribery in court), ahkaw ahkang hpe gumhpraw hte mari la ai lam (Privilege bought with money) ni a majaw rai nga ai. Myihtoi Amo gaw Ndai lam ni hpe tsun nna yubak mara ni hpe madi madun nga ai. “Tara malang ai lam hka zawn, dinghpring ai lam tut lwi ai hka-nu zawn, lwi nga u ga” (Amo 5:24) nga ai. Sut masa lam hta tara rap ra ai lam nga yang she matsan lusu rap shara lu wa na rai nga ai.

Mung masa hte seng ai tara rap ra lam
(Political Justice)
Karai Kasang a n-gun atsam (Power) gaw gawng kya ai ni hpe makwap maga na matu (to defend the weak) hte, n tara ai ni hpe jeyang dawdan na matu (to judge the unjust) rai nga ai (Luka 1:49-53). Mung up ai Asuya daru magam arawng aya lu ai ni a lit gaw mung masha ni a mai kaja ai lam makawp maga na matu rai nga ai. Madu Yesu Hkristu gaw shi hpe jaw da ahkaw ahkang hpe shinggyim masha ni hpe galaw dawjau ai lam, mungkan ngwi pyaw simsa lam, tara rap ra na lam a matu jai lang asung jashawn wu ai. Ngwi pyaw simsa lam (Peace) lu la na matu tara rap ra ai lam (Justice) gaw ra ahkyak nga ai. Tara rap ra ai lam n nga yang simsa lam hpe n mai myit mada nga ai. Dai majaw jahkrit shama, adup ajin, zingri zingrat ai lam n galaw ai simsa ngwi pyaw ai hte htunghking lailen hpe bu hpun dagraw hpang wa saga.

Hpungdim
“Tara rap ra Yesu hte sha” ngu ai ga baw gaw “Tara rap ra ai lam gaw Yesu Hkristu hte sha seng ai ngu tsun mayu ai n re. Yesu Hkrsitu a hpang hkan nna, shi hpe kam sham ai ni mung tara rap ra ai lam hpe hkan sa galaw ra nga ai. Dai ni Nawku hpung, shigggyim hpawng shingra, mungkan gaw grau mai kaja ai de galai shai wa na ra ahkyak ai ten re. Amyu hte seng ai, num la kanawn mazum lam hte seng ai, sut masa, mung masa lam hte seng ai tara rap ra ai lam ni hpe tinang a dinghku, Nawku hpung hte shinggyim uhpawng shingra hta myit mang hkan sa galaw lu u ga law.