Yangon Kachin Baptist Church
No. (40/B), Shwe Pyi Aye Street,
Sanchaung T/s, Yangon, Myanmar.
Phone: 01-527732, 502404 ext. 116
Email: JLIB_HTML_CLOAKING

194609

Sara Hkangda Naw San

Shakawn Kungdawn 46:1

“ Karai Kasang gaw anhte a Shingbyi shara hte n’gun rai nga ai. Ru tsang ai aten e karum na jin nga chyalu rai nga ai”

Shinggyim masha ni myit ru myit tsang myit daw myit hten na lam ni pru wa ten hta tinang hpe karum la na kadai? shawng de, hpang de, pai de, hkra de mada let karum la na wa hpe tam chye nga ga ai;
Rai timung, lahta de Karai Kasang hpe tam na malap chye nga ga ai.

Jang hkam sara ni gaw degree grai tsaw ai, grai kahtet ai wan hte shabyang jasan jaseng dat yang she gumhpraw jet, ja jet lu la nga ai.
Shakawn Kungdawn 66:10
“Gumhpraw hpe zawn anhte hpe shabyawng yu nit dai.”

Kalang mi na, ja gumhpraw lusu ai sahti wa gaw “Sam” ngu ai shangun ma Hkristan la kasha hte rau gumra leng jawn nna nam de hkaipyek gap sa wa ma ai. Hkrun lam e gumra leng shakrai hten ai majaw bai gram lajang ai shaloi “Sam” gaw lata adep sha nu ai. N’gup kaw na ga kinsha ndum shami a kajawng sha tsun shapraw kau dat ai shaloi, tinang hkum dum dat ai majaw kalang ta Karai Kasang hpe mara raw hpyi nem tawngban nu ai. Sahti wa dai hpe mu yang, “Nanhte hkristan ni hpe yu ba la ai; ngai gaw hkristan nrai tim ngamu ngamai ai, nanhte hkristan ni gaw nau kahprup la myit dai.” ngu jang Sam gaw mahtai nchye jaw, mau am mat nga ai.

Dai aten hta nam hkaipyek lahkawng pyen lai wa ai hpe mu wu yang Sahti wa gaw shi a sanat hpe ret di hta lang nna, gap jahkrat dat nu ai. “Si taw ai hkaipyek hpe tawn da nna, kasawt hkra nna kahprup taw nga ai hkaipyek hpe sa rim su ngu wu ai.
Sam gaw Sahti wa hpe jaw na mahtai lu ni ai. “Anhte hkristan ni gaw tsa dan agung alau kaw nna lawt lu na matu kahprup taw nga ai hkaipyek hte bung nga ai; nang sahti wa gaw wawra hkaipyek jasi sha rai nga nit dai” ngu htan wu ai.
Roma 7:15
“ Ngai shachyen ai bungli hpe ngai nchye nngai, ngai n galaw mayu ai lam galaw nga nngai, ngai ndawng nyawt ai bungli sha agalaw nga nngai.”

2006 ning October 2 ya shani Yangon-Mandalay nbungli hkrun lam; Mandalay kaw galaw na lawuga ginwang (LGZ) kasa hpawng de lung wa na matu E.C Member marai masum (Rev.Marip Ja Naw Jr, Sarama Kaba Maran Nang Doi, Sara Marip Naw San) hkarang leng lekmat, mawdaw lekmat kade lajang yu tim nlu sai majaw byin mai ai hku nbungli hte lung mat wa saga ai.

Lam dingyang apyaw angawn, “Kade nna yang Mandalay International Airport du shang wa sana re majaw................” ngu shana wa ai majaw du wa re sai ngu kabu ai myit hte shinggan de mada dat yu yang, “Le...........nbungli kagat ai lam re ngu hpaw madun tawn ai pripla wan hte anhte a nbungli wa nda de bat” bai! kalang lata Pilot ni lamu ganghkau de bai ma ja e rawt gawt lung mat wa ai gaw............Myi hprap gala ai mu hte htem, marang kaba htu nna ningsin chyip hpa nmu lu mat saga ai. Myit kaji ai lam gaw tsun hpa nnga, Sumsing Lamu hte grau ni wa yang kabu na malai shinggyim masha re ai majaw hkrit myit ni rawng wa ga ai. Sarama kaba Nang Doi a Shakawn Kungdawn 23 chyet shakrai ai lam 23 lang dang bat kau ai hpang myi hprap gala ai ten, tsam mari lam tam mu la nhtawm nbungli dabang de yu wa lu saga ai. Karai Kasang a chyeju san san re.

“Hkum hkrit et, Ngai nang hte rau rai ngai nngai.” Esaia 41:10
Htingnai Ginwang, Mogaung Sinna hkran buga gaw shaning shagu N nyang hka tung nna hka lim mat mat rai nga ai. N tsa lam maram yu yang myit htum shoi hpa lam rai nga ai. Raitimung ndai zawn shaning shagu wa kashin kau ya ai zawn rai mat ai majaw htawk dang, du tawn zawn re li amyu myu nbyin hkrum ai lam na chye lu ga ai. Sharu shatsang ai zawn rai tim, akyu jaw ai lam she rai nga ai.

Nbung laru hpyen, hka lim hkrum ai ni a jamjau tsin yam, si hkrung si htan re ai sumla VCD ni grai dut nga ma ai. Sara Lahtaw Zau Sam gaw, “hkau e, nang tsi rung yu ai nna shi ai. nang dai sumla yu nna masin gahprap wundoi mat ma lu, nang hkum yu”, nga hpaji jaw ai. Dai VCD sumla ni hpe yu ai kanu kawa nkau mi gaw, dai tsinyam hkrum sha ai ni a ru yak shoi chyum lam, matsan yu dum na zawn re mabyin ni, hkrit hpa si mang ni hpe yu nna shat nlu sha, yup npyaw myit kaji, myit kahpra let shim lum ai lam nnga ai zawn nga wa ma ai da.

Lahta de tsun mat wa ai myit ru myit yak lam ni hkrum kadup wa ai ten hta “Hkum hkrit et, ngai nang hte rau rai nga nngai.” (Esaia 41:10 ngu ai chyum ga gaw Isaraela masha ni a matu sha nrai, anhte yawng a matu nan rai nga mali ai.

2008 ning June 16 ya shani na Our Daily Bread hta ka da ai lam, John Newton shagawp ai “The kite, or pride must have a fall” ga shagawp kaw na maisau galang a lam hpe hti, sumru yu yang~ dai maisau galang gaw shi du taw nga ai lamu gangkau kaw myit ndik ai sha, shi hpe gyit hkang da ai sumri hpe gang di kau nna, grau tsaw ai, grau dam lada ai summwi ni hpang de pyen lung mat wa yu we ga nga myit lu ai hte sumri hpe abrut di kau dat nu ai. Dai shaloi myit mada ai hku nbyin wa ai sha hkang ai wa nnga sai majaw lahta de pyen lung na gaw raw, ga de she di hkrat mat wa nu ai.


Anhte mung kalang lang sawn chye ga ai. Ndai gyit hkang tawn ai ruyak lam, myitru shoi hpa lam ni gaw kaja wa nga yang tinang a asak hkrung lam grau mai kaja wa na lam de shading sharai ya ai lam ni she rai a hka!

Anhte Karai hpe mahkawn shakawn ai senhkum choir shakawn mahkawn ni hpe yu yu ga, nsi note asan sha ka da ai mahkawn hpe mahkawn yang yu maya mahku nsen rawng ai mahkawn sha rai nga ai. Nsi note kata kaw nmyit mada ai Accidentals ngu ai (Sharp, Flat, Natural) kumla ni shang wa yang mahkawn hkawn ai wa madum sumpyi dum ai wa hpe sharu shayak ai lam galaw ai zawn tai nga ai. Raitimung grau ngwi ngawn htap htuk ai mahku nsen ni hpe nmyit mada ai sha lu mahkawn, dum shakawn lu ga ai.

Karai shakawn mahkawn No.(439) ‘Kam Sham Nga U’ hpe Baylus Benjamin Mckinney ngu ai Music Ninghkrin wa shagawp shalat da ai mahkawn rai nga ai. Ndai shakawn mahkawn gaw anhte a makam masham lam hpe htawng madun dan nga ai. Myit yu ai hte jawm mahkawn shakawn ga.
“Hkum hkrit et, ngai nang hte rau rai nga nngai.” Esaia 41:10