Yangon Kachin Baptist Church
No. (40/B), Shwe Pyi Aye Street,
Sanchaung T/s, Yangon, Myanmar.
Phone: 01-527732, 502404 ext. 116
Email: JLIB_HTML_CLOAKING

213592

Sarama Tangbau Ja Dim

Anhte a Myit Mada Shara Yesu Hkristu Chyu Sha
June 28, 2008
Sarama Tangbau Ja Dim

Ja Chyumga: Roma 5:2-5
Myit mada shara ngu ai lachyum gaw : Karai Kasang anhte hpe jaw da ai “Ga ndat” ni hte maren tup hkrak jaw ya na re hpe myit mu myit hkut kam sham nga ai hpe tsun ai re. Dai ni anhte Rom:5:2-5 lapran kaw na chyum laika hpe mahta nna “ Anhte a myit mada shara Yesu Hkristu chyu sha ”ngu ai ga baw hpe, jawm myit yu let wenyi n-gun atsam jawm la ga ngu saw lajin mayu nngai re law.
Ndai Chyum laika a shingdu labau hpe yu ai shaloi Kasa Paw Lu a masum lang ngu na Sasana hkrun lam rai n ngut yang AD - 57 daram hta Korinhtu mare kaw nga nga ai shaloi Roma Hpung masha ni hpe ka shagun dat ai laika hpe mu lu ai. Ndai lam hte seng nna daw masum hku nna wenyi n-gun jaw mayu nngai re law.

I. Ru yak tsinyam kata kaw na anhte hpe myit mada shara jaw tawn da ai lam
Dai ni anhte n-myit mada tawn da ai sha, anhte man kaw ru yak tsinyam amyu myu du pru wa ai shaloi, myit mada shara n nga sai zawn nga hkam sha ai ten law law rai nga ga ai. Ga shadawn; Lai wa sai May shata praw 2 shana kaw na praw 3 ya shani ka-ang daram du hkra bung ai Nargis nbung laru kaba a majaw Yangon mare ting hpun sumpum hkrai rai mat ai, Nta kaw na shinggan de pru hkawm na lam pyi n hku mat ai. Gara de mada dat timung, myit htum si na zawn zawn nga.( Anhte a nta mung hpri sut pa langai mi pyi nnga mat hkra poi mat wa ai.) Kalang mung n-hkrum ga ai re majaw, ya du hkra nbung nsen na yang pyi hkrit ai myit gaw rai n-wai taw nga ai.

Anhte Yangon mare gaw n-gun kya ai nbung laru sha re ai nga tim dai daram sawng ai wa Irrawaddy Division panglai hkingau na mare ni gaw la pyi n mai, mare ting mat mat ai shara law law, tinang a dum nta masha shamat ai ni, madu jan, madu wa, kashu kasha sha n-ga, tinang lu ai htingbut htingra, arung arai, du sat yawng atsai awai myi grip mi hte sha nbung e kawut shapyen kau, nbung laru sha n ga hka mung bai lung wa ai majaw, hka kaw marit si ai mung yau yau....Dai ni anhte hkrum kadup nga ai mabyin hpe yu dat ai shaloi gaw myit mada shara n nga ai zawn nga hkam sha ai.
Rai timung Nargis nbung laru a majaw, anhte mungdan a lam hpe mungkan ting kaw na mu mada wa ai majaw, myit shang sha let, tsawra myit madun karum kahtau ai lam hpe, anhte mungdan kata kaw na mungchying sha ni mung/maigan mungdan shagu na ni mung malu masha hku nna, tsi mawan, arung arai, masha n-gun, tinang chye ai hpaji machye machyang hku nna mung sa karum kahtau ai hpe hkam la lu nga ga ai re. (YJH kaw na mung dang lu ai made Hpt. ni woi awn nna galaw nga ga ai)

Tsun mayu ai gaw, Karai Kasang gaw Anhte mungdan matsan mayan yak hkak taw nga ai hpe matsan dum ai majaw, mungkan ting mu mada wa hkra Nargis nbung laru kaba hpe jai lang nna, ndai zawn re mabyin hpe byin shangun ai re ngu hkam la ai. Panglai hkingau kaw nga nna galaw lu galaw sha nga ai hpu nau ni a nga sat nga sa madang gaw mala la naw re ai hpe mu mada ai, rai timung Nargis nbung laru a hpang kaw na gaw, nga sat nga sa madang, tam lu tam sha lam, hpaji lam, hkam kaja lam hta grau nna chye na hkawn hkrang wa nna, rawt jat galu kaba wa na lam de rai wa na sai ngu kam ai. ( Karai Kasang byin hkrum shangun ai mabyin mahkra gaw, kaman lila n re, myit mada shara n nga ai hpa mung n nga ai.)

Dai majaw ahkyak htum gaw, kaning re ai ru yak tsinyam kata kaw na mung anhte hpe kabu hara awng dang lu ai lam jaw ya lu ai gaw, Yesu Hkristu chyu sha re hpe kam sham let, shi a matsun mungga hte maren hkan sa nga na sha ahkyak htum re.
Kasa Paw Lu mung Romma Laika ka nga ai ten hta nan, ru yak tsinyam amyu myu, zingri zingrat amyu myu hkrum sha taw nga re hpe shing du labau hta mu lu ai. Kam sham ai Hkristan ni gaw Karai Kasang kaw na kabu gara ngwi pyaw ai, hta ni hta na asak hpe lu la magang sai re, rai timung daw chyen sha naw rai nhtawm, hpring tsup ai asak Janmau hpe htawm hpang e lu la na re ai hpe myit mada let, kabu gumrawng nga na lam hpe Rom 5:2 hta tsun da ai re.

Kasa Paw Lu shi nan kabu gara shiga hkaw tsun ai majaw law law lang rim hkrum ai, zingri zingrat hkrum ai, gayet anu ajin hkrum sha ai, rai timung Kasa Paw Lu gaw madu Yesu Hkristu a wudang hpai lawm na ahkaw ahkang lu la ai re ngu hkam la let, kabu gumrawng nga ai wa re majaw, shi hkam jan lu nga ai. Kasa Paw Lu myit mada ai lam gaw kaya kahpa jahkrum na n re hpe shi hkrak chye na hkawn hkrang ai. Rom 5:2-5 lapran hta tsun da nga ai re. Kasa laika 7: 54-60 lapran hta yu ai shaloi shawng ningnan na Hpt. Stehpan mung nlung hte kabai sat hkrum sai rai timung, shi nsa rai n hti yang, Yesu Hkristu chyu sha, hkye la madu hte masha yawng a myit mada shara re ai lam hkaw tsun sakse hkam sai, Stehpan a hkaw tsun sakse hkam ai mungga a jaw, Kasa Paw Lu gaw myit hta grai hkra mat nna, hpang jahtum Sasana galaw ai Sara Kaba byin tai wa sai hpe mu lu ai re.

Anhte Myen Mungdan de 1813 ning July 13 ya shani Sasana sa galaw na du sa wa ai Sara Kaba Judson mung ru yak jamjau amyu myu, zing ri zing rat amyu myu hkrum sha ai sha n ga, madu jan (2) hte, kasha ni marai (8) hpe Myen mungdan kaw lup kau da ra ai re, kade daram ru yak tsinyam hkrum timung Hkristu hta myit mada let Sasana magam bungli hpe matut galaw ai majaw, dai ni Myen mungdan hta shi a asi (sh) kam sham ai ni wan mi jan du wa sai hpe hkam la lu saga ai re.

II . Hkristan ni a myit mada shara hpe Madu Yesu jen sat hkrum ai Wudang hta mung mu lu nga ai lam
Madu Yesu wudang ntsa jen sat hkrum ai lam hpe yu ai shaloi, lam lahkawng hpe mu mada lu ai.Lam langai mi gaw, ru yak tsinyam, zingri zingrat anu ajin kayet ai, mayen mahtaw bun ai, ju lagup gup ya ai, hpri maina hte wudang ntsa hta dawk shakap ai. (Shinggyim masha langai hpe zingri ai ngu ai hta sha gaw degree htum sai hku re). Bai lam lahkawng ngu na gaw, A lu ai tara (sh) si ai kaw na bai hkrung rawt wa ai, htani htana asak ngu ai hpe mu mada lu ai.

1 Kor 15:14, Hkristu gaw bai n hkrung rawt a yang gaw, anhte a hkaw dan ai ga kaman li la rai nga ai hte, anhte a makam masham mung kaman li la sha rai nga ai. Kaja wa Madu Yesu si ai kaw na bai n hkrung rawt ai rai yang, Madu Yesu a kabu gara shi ga hkaw dan ai mung kaman li la sha rai nga ai. Madu Yesu nan mung anhte hpe hkaw tsun ai lam, sharin achyin ai lam hte anhte hpe jaw da ai ga ndat law law ni mung, hpa lachyum pru na n re, kaman li la sha rai nga ai, kam sham ai ni mung myit mada shara hpa n nga sai.

Rai timung Mahte 20:19 hta, asawng asang ,anu kayat ai hte wudang hta jen da hkrum na matu, maigan amyu ni a lata de ap hkrum na matu, maigan amyu ni a lata de ap kau na mara ai, masum ya nhtoi hta e bai sharawt la ai hkrum na ra ai ngu mu ai.

Yaw 11:25-26 hta mung, Bai Yesu gaw, Ngai gaw bai hkrung rawt ai lam hte asak hkrung ai lam rai nga nngai, ngai hpe kam sham ai wa gaw, si mat timung ahkrung nga na ra ai. Asak hkrung nna ngai hpe kam sham ai wa kadai mung si ai galoi mung n hkrum na ra ai.Ga ndai hpe nang kam n ni? ngu nna shi hpe tsun wu ai.(Ndai gaw Marhta hpe san ai ga san rai nga ai)

Dai ni anhte hta byin hkrum sha taw nga ai ru yak tsinyam, myit hki lit li nga ai ni, myit nji nmu hkrum sha nga ai ni, n tara ai lam hkam sha nga ai ni, yawn hkyen hkrum nga ai ni yawng gaw, wudang ntsa si hkam ai Madu Yesu a tsawra myit hte lani mi awng padang lu la na lam, myit mada shara jaw da ai hpe kam shut shara n nga ai. 1 Htes 4:13, Dai hta kaga, hpu nau ni e, myit mada ai lam n lu ai masha zawn, nanhte yawn hkyen n hkrum myit ga, yup pyaw nga ai ni a lam nanhte n chye ai nga na, anhte n ra ga ai.

III. Hkristan ni a myit mada shara gaw htawm hpang a matu sha n rai, Dai ni na prat a matu mung rai nga ai lam
Masha nkau mi gaw, Hkristan ni a myit mada ai lam gaw htawm hpang hte sha seng ai ngu hkam la chye nga ma ai. Rai timung, anhte kam sham ai ni a myit mada shara gaw ndai prat hte mung seng nga ai re. Hpa majaw nga yang, Hkristan ni a myit mada shara gaw hkrung rawt wa ai madu Yesu Hkristu a sharin shaga ai lam sha n ga, anhte hpe jaw tawn da ai “Ga ndat” law law hpe hkap la kam sham ai lam hta myit mu myit hkut ai hte hkawm sa sak hkrung shangun ai majaw re. “Ga ndat” ngu ai gaw hpawt ni na matu dai ni jaw ai rai nga ai. Ga shadawn; Kanu Kawa ni hku nna tinang a kasha hpe, dai ning tsang shi hta All-D hte awng jang Computer mari ya na ngu ai “Ga ndat” jaw tawn da ai rai yang , kasha gaw kanu kawa shagrau na kumhpa kaba hpe myit mada let, shi a tan laika hpe shi lu ai atsam htum hkra shakut na n-gun lu la nga ai.

Dai hte maren anhte Nawku kam sham ai Madu Yesu Hkristu mung anhte hpe “Ga ndat” jaw tawn da ai hte maren shabyin ya lu ai Madu re lam, Roma 4:21, Karai Kasang hpe shakawn kungdawn nna, Ga ndat da ai hte maren Shi shabyin na ra ai hpe myit ajung nga ai). Anhte a dai ni na aprat hta sak hkrung hkawm sa wa ai shaloi myit mada shara n nga na zawn nga hkra hkam sha ai mayak manghkang amyu myu hpe hkam jan lu ai atsam jaw ya nga ai majaw, anhte tsinyam tsindam hkrum timung kabu gumrawng lu nga ga ai re.
Kasa Paw Lu gaw:

Roma 8:18, Kaning rai nme law, ndai aprat na tsinyam tsindam gaw, anhte kaw e shadan shapraw na ra ai hpung shingkang hte shadawn n-ging nga ai, ngai myit nga nngai.

Hpang jahtum hku nna,
Dai ni na aten hta, anhte a makau grupyin hta byin nga ai mabyin ni, anhte nan hkam sha taw nga ai mabyin ni hpe yu yang myit mada shara n lu ai zawn nga hkam sha nga ga ai re. Rai timung, anhte kam sham ai Madu Yesu gaw, anhte a hkye la Madu, awng padang lam jaw ya lu ai madu re .

Dai majaw, anhte a myit mada shara Yesu Hkristu chyu sha rai nga ai hpe kam sham let, matut nna sak hkrung hkawm sa wa ga. Hebre 10:23

Anhte a myit mada shara hte seng ai Nawku htung hta n shamu n shamawt hkra anhte maju jung nga ga, kaning rai nme law Ga ndat tawn da ai wa gaw, kang ka re ai wa rai nga ai.